kapitel4vonteil1


Kapitel IV von Teil I 

Die ganz Wuche dure isch es im Büro schtressig zue und här gange. De Raymond isch einisch zu mier id Wonig cho und het gseit, är heyg jetzt de Brief abgschickt. Ich bi mit em Emmanuel zwei Mal isch Chino, wo de Emmanuel nid immer begriift, was uf de Liinwand passiert, und drum frögt, ob me's ihm erkläre chönn. Geschter isch Sunntig gsi, und wie verabredet isch d'Marie cho. Sie het es sehr hübsches Chleid treit, mit rote und wysse Schtreife. Me het d'Uusbuchtige vo ihren chline Brüscht gseh, und ihres sunnebrüünte Gsicht isch wie en siidig-bruuni Blueme gsi. Wier händ de Bus gnoh und sind zu mene Schtrand, es paar Kilometer entfärnt vo Algier. Es isch en Schtreife Sand zwüsche zwei fälsige Linie mit e chli Schilf. Am vieri isch no nid so heiss gsi, s'Wasser isch au aagnähm gsi, mit sanfte, lange Wälle. D'Marie het mer es Schpil zeigt: Meh schwimmt und trinkt de Schuum vo de Wälle. Wenn me s'Muul voll mit Schuum het, liit me uf de Rugge und schprützt de Schuum in Himmel ufe. Die Fontäne isch churz i de Luft gsi und eim dänn aagnähm uf de Chopf abe grägnet. Aber glii het mis Muul aagfange bränne, wäg em Salzwasser. Im Wasser het mich dänn d'Marie umarmt, und eusi Müüler händ sich küsst. Ihri Zunge het mini Lippe gchüelt. Öppe ei-zwei Minute hämmer d'Wällene über eus Rolle lah, bevor mer zrugg as Land sind. Wenn mer eus aagleit händ het d'Marie mich fordernd aagluegt. Ihri Auge händ glänzt. Vo dänn a het es Wyli niemer vo eus me öppis gseit. Ich ha si a mich drückt, wo mer d'Schtäge vom Schtrand zur Schtrass ufegschtige sind. Mier sind pressant gsi, zu mier hei z'ga. 

Ich ha dihei d'Feischter uufgmacht und offegla, äs isch aagnähm gsi, die chüeli Nachtluft uf eusne sunnebrünte Körpere z'gschpüre. D'Marie het gseit, sie heyg frey am nächschte Tag. Ich ha vorgschlage, mier chönnted zäme ässe. Si isch iiverschtande gsii. Ich bi abe ga Fleisch chaufe. Uf em zruggwäg han ich us de Wonig vom Raymond en Fraueschtimm gchört. E chli schpöter het de Salamano aagfange, Flüech gäg sin Hund z'murmle; es händ Schritt und Tatze uf de Holzschtäge tönt, Dänn: "Baschtard". Die Beide sind us em Huus uf ihre Schpaziergang. 

Ich ha de Marie d'Gschicht über de Salamano und sin Hund verzellt, und si het au müesse lache. Si het eis vo mine Pyjamas treit, mit ufegringlete Ermel. Wo si glacht ha, han ich sie scho wieder wölle... En Momänt schpöter het si mi grögt, ob ich si liebe. Ich ha gseit, die Art vo Frag bedüüti nüt. Sie het truurig uusgseh, aber ds Ässe het si uufgheiteret und si het wieder glachet und immer wenn sie lachet, will ich sie küsse. 

Genau i däm Momänt isch im Raymond sinnere Wonig en Krach losgange. Zerscht hämmer en Frau mit ere höche Schtimm öppis umerüefe gchört, dänn de Raymond: "Du hesch mich verarscht, du Schlampe! Ich will dich lehre, mich z'verarsche!" Es paar Schlaggrüsch, dänn en höche Schrei. Es isch eim schier ds Bluet i de Adere gfrore. Uf ei Schlag sind alli Mieter im Schtägehuus usse gschtande. D'Marie und ich sind use ga luege. D'Frau het immer no gschroue und de Raymond het si gschlage. D'Marie het gseit, das seyg doch schrecklich, ich ha nüt z'säge gwüsst. Sie het mer gseit: "Hol doch en Polizischt!" aber ich ha gseit, ich heyg nid gärn Polizischte. Äs isch sowieso grad eine uuftaucht. De Mieter vom zweite Schtock, en Sanitär, het en Polizischt i euse Schtock ufe begleitet. Är het a'd Türe gchlopfet, und de Lärm het uufghört. Är het no einisch gchlopfet, und nach eme churze Momänt het d'Frau aagfange schreie und de Raymond het d'Türe uufgmacht. Ihm isch en Zigarette vo de Unterlippe abeghanget und är het blass glächlet. "Ihre Name?". De Raymond het sin Name aagäh. "Nimm die Zigarette us em Muul, wenn ich mit dier rede!" het de Polizischt gmotzt. De Raymond het nid ghorcht, mier zuezwinkeret und d'Zigarette im Muul bhaltet. De Polizischt het plötzlich mit de Hand uusgholt, und ehm i eim Schtreich d'Zigi us em Muul gfätzt. D'Zigarette isch fortgfloge. De Raymond het en schiefe Blick druffgha und nüüt gseit. Dänn het är murmelnd gfrögt, ob är d'Zigarette döfi uufläse. De Polizischt het "Ja" gseit "Aber vergässed Sie nächschts Mal nid: Wier verschtönd kei Schpass! Nid vo Lüüt wie ihne!". 

I de Zwüschezyt het d'Araberin aagfange schluchze und immer wieder ununterbroche chlage: "Är het mi gschlage, de Feigling. Är isch en Zuehälter." De Raymond het unterbroche: "Entschuldigung, Herr Wachtmeischter, aber darf die Frau öppert eifach vor allne Lüüt 'Zuehälter' nänne?". De Polizischt het am Raymond gseit, är söll "z'Schnurre zue" ha. De Raymond het de Frau gseit:"Kei Angscht, Meitli: Wier gsehnd eus sicher mal wieder." "Das isch gnueg" het de Polizischt gseit. D'Frau het chönne ga. De Raymond het i de Wonig müesse blibe, bis är het chönne abgfüehrt wärde. "Sie sötted sich schäme," het de Polizischt gseit. "dass Sie so vill trinked, dass si nid mal meh chönd graad schtah ohni z'zittere!" "Ich bi nid bsoffe!" het de Raymond gseit "aber wenn ich Sie gseh, wie Sie mich aaschtarred, dänn zittere ich. Das isch natürlich." Nach däm d'Türe zuegange isch, sind alli Lüüt au wieder i Ihri Wonige zrugggange. D'Marie und ich händs Ässe fertig vorbereitet. Aber si het kei Appetit me gha und darum han ich fascht alles sälber gässe. Am eis isch si gange, und ich ha chli gschlafe. Gäge die Drü het de Raymond gchlopfet und isch inecho. Är ich uf mini Bettkante gsässe und zerscht het niemert vo eus öppis gseit. Ich ha en gfrögt, wie sich das alles abgschpillt heyg. Är het gseit, zerscht seyg alles ganz ruhig gloffe, wie nach Plan. Aber wonn är ihre d'Ohrfiige versetzt heyg, heyg är plötzlich Rot gseh und abermals uf si ineprüglet. Und was dena alles passiert seyg, das wüssi ich ja scho. "Du hesch ihre also en 'Lektion' erteilt, und das hesch wölle, nid wahr?" Är het das au so gseh, und betont, was au immer d'Polizei gäge ihn machi, das würdi nid rückgängig mache, was är de Frau scho aata heyg. Usserdäm wüssi är guet, wie me mit de Polizei müess umgah. 

Aber är hett wölle wüsse, ob ich erwartet heyg, dass är zruggschlaht, wenn en Polizischt ihn schlaht. Ich ha ihm gseit, dass ich gar nüt erwarti; dass ich d'Polizei aber au nid gärn heyg. De Raymond isch froh gsi und het gfrögt, ob ich chiem cho schpaziere. Ich bi us em Bett ufgschtande und ha mier d'Haar bürschtet. Dänn het de Raymond gseit, är wöll mich als Züüge. Ich ha em gseit, ich hetti kei Iiwänd da degäge. Aber was sötti ich säge als Züüge? "Das isch ganz eifach" het de Raymond gmeint: "Säg däne eifach, dass das Meitli mich betroge heyg." Ich bi also de Züüge worde. 

Wir sind use ga schpaziere und de Raymond het mich uf en Drink iiglade; dena simmer no ga Billard schpile. Haarscharf het de Raymond gwunne. Dena het de Raymond vorgschlage, zäme in es Bordell z'gah. Aber ich ha sini Iiladig abglehnt, will ich nid gärn i Bordell gah. 

Wommer langsam zrugggloffe sind, hett de Raymond mier gseit, wie sehr är froh seyg, sini Ex-Fründin so guet beschtraft z'ha. Är het sich bi mier iigschmichlet und ich ha euse Schpaziergang zimlich gnosse. Wemmer fascht dihei gsi sind, han ich de Salamano uf de Türschwelle gse. Ich ha gseh, dass är ohni Hund isch. Är het sich wie en Brummkreisel i all Richtige dreit und glueget, wo ächt de Hund chönnt si. Mängisch het är regelrächt id Dunkelheit vom Schtägehuus gschtarrt, mit sine chline bluetunterlaufnige Auge. Dänn het är öppis gmurmelt und ufd Schtrass gschpäht. De Raymond het en gfrögt, was los seyg, aber är het nid gantwortet. Är het grunzt "Dä Baschtard!". Ich ha gfrögt: "Wo isch Ihre Hund?" "Abghaue isch är!" het de Salamano gschroue "Ich ha en wie immer zum Paradeplatz gfüehrt, dört isch en Mäss gsi, mit eme regelrächte Volksuuflauf, wo me fascht nid durecho isch. Bi einere vo de Schaubude - emene Entfässligskünschtler - han ich aaghalte. Wenn ich wieder ha wölle gah, isch de Hund verschwunde gsi. Scho immer heyg är ihm es ängers Halsband wölle chaufe, und jetzt seyg dä Hund entschlüpft." De Raymond het em Salamano versicheret, dass de Hund einisch zruggchiem und het Gschichte vo Hünd verzellt, wo Kilometer zrugggleit heyged, zum ihres Herrli wiedergfinde. Aber das het de Salamano nume no besorgter gmacht. "Verschtönd Sie nid? D'Schmier oder d'Hundefänger wärded dä Hund iischlöfere! Äs isch unwahrschinlich, dass süscht öppert ihn uufnimmt, dänn är het ja sini Huutchrankheit und isch hässlich - das schtoss alli Lüüt ab." Ich ha ihm verzellt, dass d'Polizei streunendi Hünd in en Chefig tuet. Sin Hund sig sicher dört, und gäg en chlini Gebühr chönn är ne abhole. Är het mich gfrögt, wie höch die Gebühr sig, und ich has nid gwüsst, sondern gseit, är sell vorbiigah. Dänn het är wieder en Wuetaafall übercho. "Gäld zahle für eso en Sauhund? Chunnt nid in Frag! Vo mier us chönds en töte!" Är het sin abwesende Hund dänn bi de übliche Näme gnännt. De Raymond het glachet und ich gange. Ich bi nem nachegfolgt und mier sind i eusi Wonige. Ei oder zwei Minute schpöter han ich am Salamano sini Schritt im Schtägehuus gchört, und dänn het de Salamano mier au scho ad Tür gchlopfet. Wenn ich göffnet ha, het är gmeint: "'Tschuldigung, ich hoffe, ich schtör Sie nid." Ich ha ihn inebätte, aber är het wölle dusse schtahbliibe. Är het uf sini Zecheschpitze gschtarrt und sini Händ händ zitteret. Dänn het er gseit: "Me wird en mier doch nid öppe wäg näh? Nid wahr, Herr Meursault?" "So öppis würdeds sicher nid mache", han ich beschtätiget. "Ich weiss nid, was us mier sött wärde, fall si ihn mier wägnämed" Ich ha gseit, dass - sofern ich weiss - schtreunendi Hünd sibe Täg immene Chefig bhalte wärded und: "...me wartet druf, dass de jewilig Bsitzer sich mäldet. Erscht dänn wärded d'Hünd iigschlöferet." Är het mich zerscht nume schtill aagluegt und dänn gseit: "Guete Aabig". Dena han ich ihn i sinnere Wonig uf und ab laufe gchört. Dänn het sis Bett quitscht. Durch d'Wand han ich en liislige schrille Ton gchört und vermuetet, dass de Salamano brüelt. Irgendwie - ich weiss nid warum - han ich muesse a mini Mueter dänke. Aber ich ha am nächschte Tag früeh müesse uufschtah, darum bin ich - ohni Znacht, zumal ich nid hungrig gsi bi - diräkt is Bett. 

Gratis Homepage von Beepworld
 
Verantwortlich für den Inhalt dieser Seite ist ausschließlich der
Autor dieser Homepage, kontaktierbar über dieses Formular!